انا ودي اوصل رايي كامل في موضوع منفصل من سلبيات و ايجابيات و غيره ، بس بحاول اقول لك اللي ببالي في بعض النقاط اللي ذكرتها
ساري ماهو المدرب المعصوم عندي او عند أي احد يتمنى استمراره و لا هو المدرب الساحر ، و مستحيل بنتعذر كل المباريات اللي خسرناها بالاعذار , الكل يشارك بالمسؤولية ، يالسمي الموضوع بأكثر من جهة , يعني الصراحة لو تشوف الفريق الحالي و الله الخيارات محدودة / ممكن الاحظ عليك انت مع الاستمرار بالتشكيلة الاساسية بس شلون تلعب كل 3-4 ايام و اغلب اللاعبين ما عندهم بدلاء ( ممكن ترتاح و انت تبدلهم او تريحهم ، يعني لو مثلاً ديميرال جاهز و عندك بونوتشي و دي ليخت , فيه راحة اهني اكثر و انت تبدل بينهم ) و غير انك مضطر تلعب عاهات مرات اساسيين ، فيه لاعبين ممكن شفنا عليهم استمرارية و مقدمين زين بس حتى اهما تحصل مباراة فجأة تلاحظ عليهم تعب , هذه فترة ماهم متعودين عليها ، و عارفين انه ماهو اليوفي بس , بس كل فريق شوف عاد دكته و شوف اصاباته و شوف اداءه ، منو تشوف افضل فريق بالدوريات الأربع لعب بفترة الزحمة و بدون لا يسوي تدوير ؟
يعني انت كنت تبي كوستا يلعب مستمر مع انك تدري ممكن يصاب بسرعة و انا والله اشوف دوغلاس كوستا اكثر لاعب ممكن يكون حاسم لو هو فعلاً بجاهزيته و لا يصاب بس خلاص الموضوع وصل حده و لا كلنا عارفين كوستا و قيمته ، و كان واضح الخطة الاستعانة فيه على الاقل 30-40 دقيقة بالمباريات و اللاعب بنفسه اذا ما شفت تصريحه متكلم عن نقطة الاصابات ، و هذا اللي قاله من شهرين : " هناك اوقات كنت افكر فيها : هل يمكنني الاستمرار باللعب ؟ لأنني أذهب للملعب و أصاب مرة اخرى ، ثم عند مشاهدة التلفاز أفهم هذا أن هذا هو شغفي و انه لا زال بامكاني اللعب على مستوى عالي ، انا امزح مع زميلي اليكس ساندرو بأن لدي صدى أكثر من المشاركات ، يقول الناس ان دوغلاس لديه القدرة ليكون واحد من بين افضل اللاعبين في العالم لكن الاصابات تمنعه ، هذا الشيء يزعجني ، لدي القدرة لأكون لاعب ممتاز لكن سواء كان بخطأي او لا , لا أستطيع ان اكون بأفضل شكل , هذا مزعج جداً " ..
بالنسبة لرابيو و بيانيتش و رامزي ، و البداية من رامزي تقولي حبيبك ( ايه والله , اذا دوغلاس كوستا و بناء على اللي شفته اشوفه نجم , رامزي و بناء على اللي قدمه في ارسنال بس عيبه الدايم - الاصابات - و الحين قرب من الـ 30 سنة و واضح عليه المشاكل البدنية اكثر من مسألة نوعية , تشوف عليه الثقل و الاصابات ما استبعدها ، كنت اتمنى بداية الموسم مثل ما اتمنى لكوستا يكونون جاهزين باستمرار و متأكد بيكونون اضافة بس رامزي ماهو قادر يكمل مباريات على بعضها و اتوقع التوقف خربها اكثر لان قبلها كان بدا يدخل ، و الفريق خلاص ما بيقعد ينتظر كل فترة على ما يجهز رامزي اذا بيكمل على هذا الشكل من حيث الجاهزية و الثقل ) ، و شفنا رابيو اخر المباريات فيه قتالية اكثر و يتحرك بس بدون ما نضحك على بعض ما عنده اللمسة اللي تفرق بالامام بس الصراحة اول 20 مباراة لاعب عادي ( لعب حوالي 25 مباراة اساسية حتى الحين ) و كل التقييمات حتى دليل عليها , ما بدا يرتفع تقييمه الا اخر كم مباراة ( و اتمنى فعلاً يستمر يتحسن و لا يستمر بس على كذا , وقتها بيكون حتى لو اشتروا لاعب وسط جديد , يكون فيه دكة زين جاهز )
و مع بيانيتش ، تراه لاعب اساسي من اول الموسم و موسمه المخيب اهوا بنفسه اللي يتحمله ، قليل جداً شفناه بالدكة ، بيانيتش لما نقرا اسمه نتوقع التمريرات الحاسمة اول شيء و نتوقع لما يهاجم يكون فارق بس صراحة هالاشياء ما شفناها ، و بالدفاع والله يخوف و ثغرة لما يهجمون من العمق عليه ، و مع هذا ماهو ساري اللي باعه , شفنا الصفقة التجارية 100 % ، بينتانكور ماهو الخيال اللي بيغطي مكان الريجيستا بشكل عام بس ممكن يتطور اكثر مع الوقت و اتوقع انت تتمنى هالشيء بعد : ) و لا ندري اذا بيتم ريجيستا او جورجينهو او لاعب غيره ، السوق للحين عندي غامض , الاندية متأخرة مع هالمباريات
و بالنسبة للاسماء : [ والله العظيم انه ماهو ساري اللي يدير سوق الانتقالات و احنا شايفين الفريق من سنتين قاعد يخربط اكثر بالسوق و يبي الارباح بزيادة و مبادلات و لا منو كان يتوقع صفقة في اخر السوق المالي 30 يونيو في مبادلة سبينازولا بيليغريني ! واضحة الفلوس لاعبة براسهم ، اقص ايدي اذا ساري له علاقة كان بالسوق ، اتمنى انهم قاعد يشوفون الفريق هذا الموسم و العاهات و الزجاجيين و اقول لعل و عسى السوق الياي نشوف جم صفقة زينة بدون خرابيط , مو شرط توب و يتعزز الفريق ]
و بالنسبة للسوق الحالي , تو الناس , للحين نايمين الناس ، و صفقة المهاجم حتى لو كان ميليك , احنا نبي جناح توب يكون مع ديبالا و رونالدو , المهاجم ممكن يكون مهاجم زين للدكة , اذا راح رونالدو يصير خير وقتها لازم يشترون مهاجم توب
مسألة الفرصة للمدرب , ماهي معناها يعني موسمه اللي كان مقنع و خلاص لازم يكمل , بس اسلوب اللعب غير و اللاعبين المتاحين وضحت فوق يعني خيارات ماهي كثيرة و مافيه عنده الضمان لنجاح أي احد بس هذا الشعور من متابعتنا ( و غير انه اللاعبين كانوا متعودين على اسلوب غير بالدفاع ) ، يكون الحكم افضل مع صفقات افضل و مع موسم ثاني ، يعني لو بناخذ مدرب ثاني , نفس الشيء الادارة لازم تقوم بسوق زين ، و لو صارت و اختاروا مدرب مفروض بعد الفكر الهجومي اكثر بس مافيه مدرب بيدخل الفريق الا و الفريق لازم يصحى بالسوق الياي
ان شاء الله موسمك ماهو صفري و يحسم و نفرح كلنا باللقب هذا بعدين نفكر شنو يحصل بعده :icon26:
!